• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Seguridat di nos Pueblo mester wòrdu trata ku seriedat

Ta inkreibel kon esnan ku a hasi bofon di MFK su intenshon pa ekipá polis i ponementu di kámaranan di vigilansia na Kòrsou, awe ta pidi Gobièrnu pa ehekutá e mesun plan.

Seguridat di nos Pueblo mester wòrdu trata ku seriedat.

Ta tristu di mira kon nan Kòrsou, pa puramente finnan polítiko nos ta dispuesto pa hasi tur lokual ku un otro ke bini kun’é na bienestar di e pais pa stroba, kibra i den sierto kasonan asta hasi bofon di esaki.

Mi ta referí na e kampaña ku MFK a hiba durante elekshon di òktober 2012, kaminda nos a hasi menshon ku nos lo bai na ekipá polis mihó dor di kumpra 200 outo spesial destiná pa trabounan polisial, nos lo ekipá polis mihó dor di kumpra armanan nobo. Un di e puntonan di sumo importansia ta kaminda nos lo a pone tambe hopi énfasis den instalashon di kámaranan di vigilansia na puntonan konfliktivo riba nos isla. E plan aki a bini despues di a hasi un investigashon profundo tantu den nos komunidat ku no por sigui biba den inseguridat i tambe den Kuerpo polisial kiko tabata e defisiensianan ku ta evitá ku nan por funshoná optimalmente. Nos dushi pueblo ya pa basta aña kaba a pèrdè e sentido di seguridat riba nos isla. Gobièrnunan di turno a dediká hopi tempu na diferente otro tópiko i a lubidá di traha riba e parti sosial i esun di seguridat di nos pais.

Dia ku nos a anunsiá esaki mi ta kòrda bon bon, kon partido Pueblo Soberano, ku na su turno no a hasi nada pa a remediá e situashon di kriminalidat riba nos pais, pero si a sali mesora i hasi bofon di nos plan pa ku kombatimentu di kriminalidat. Ta p’esei awe mi no por a kere mi orea, ora mi a skucha un miembro di Parlamento di Pueblo Soberano a bisa ku mester instalá kámaranan di vigilansia na Kòrsou. E la asta menshoná e sifra “100”. Awor e pregunta ta bini, kiermen nos plan ku bosnan a hasi bofon di dje a resultá di ta bon al final. Si a analisá e plan sin wak ken a trese for di gabinete Betrian bini ariba kámaranan lo a wòrdu instalá, paso esaki lo tabata nesesario den nos pais.  Esaki lo a fasilitá e trabou di Polis engrandemente . 

Manera nos tur sa, na Kòrsou a bira manera un disko raya ku tur e ministernan di Hustisia di turno ta bisa ku e problema di kriminalidat riba nos isla no ta di nan, pero ku ta algu ku nan a heredá. Aserka nan ta trese dilanti ku mester wak tur e otro ministerionan pa yuda solushoná esaki. 

Kuantu mas nos mester warda pa nos ta trankil den nos mes pais.

Seguridat di nos komunidat ta tarea prinsipal di e titular di Hustisia. Pueblo mester mira i sinti ku e minister di Hustisia ta hasiendo todo por todo pa garantisá nos seguridat. Mi mester menshoná ku esaki NO ta tumando lugá.

Pueblo di Kòrsou husga pa bosnan mes. Bosnan a tuma nota ku e ministernan di Hustisia di turno e último tres aña nan aki a tuma medida, proyekto nan pa yuda kombatí kriminalidat riba nos isla i ku bon resultado?  

Pa esnan ku kier skucha kiko nos plan tabata por subi www.youtube.com buska “Polis bon ekipá” i skucha pa bosnan mes.
pik_pisas_parlamento_mei2013

Webmaster

Leave a Reply